Тулорлык сынан тольо шошо… (Рукотворный пожар, кидыштыш тулорлык)

Игече йӱкшемдыме семын

Тулорлык илемыш нушкеш,

Каласе йолташ, шошо жапын

Молан гын тӱжваке лектеш?

Да шыдыжым утыр погалын,

Кумдан талышнен вияҥеш.

Куштрам, тошто кошкышо шудым

Содор йӱлаташ кержалтеш,

Вара талышнен вийым налын,

Чодраш, илемлаш лупшалтеш.

Лиеш титаклаш тыште тӱрльым:

Игечын кукшужым налаш,

Тулйыпым шаркалыше шошо мардежым

Да улшо шӱкшакым орлаш.

Кеч кушто, кеч мом тый титакле –

Амал лачак икте улеш,

Шымлен ончалмашыште пале –

Айдемын титакше лектеш.

Вот эртыш айдеме,

                    кудалтыш тамакшым,

Тулпижмым шӱкшакышке,

                                 шотыш налде,

А весе тошкемыште

                            чӱктыш тулотым,

Тидлан ончылгоч

                        ӱшанвер ямдылде.

Монча кугыза

              шке коҥгашкыже олтыш,

Да луктын кудалтыш

                              тулшолым шала,

Йоча муын лукто

                тулшырпыжым шолышт,

Моткоч палынеже –

                                  кузе тул йӱла.

Кеч кушто, кеч мом

                      титаклаш тый толаше,

 Амал садыгак

                      мемнан дечын лектеш.

Тулорлык сынан

                        ынже лий шошо таче,

Ты ойым, йолташ,

                              шарнашетак кӱлеш!

Апрель, 2020 ий.